Rivista di stampa di l’Adecec

U cunsigliu generale di Cismonte hà vutatu sta mane una somma di 150 000 euro pè dalla à u SCB. L’eletti di l’uppusizione si sò astenuti. Dunque, ghjè cù 2 suvvenzione chì u SCB si presenterà davant’à a DNCG u 5 di lugliu.

Ci serà un terzu prucessu pè Yvan Colonna postu chì a corte di Cassazione hà annullatu stu dopu meziornu a so cundanna à perpetua pè l’assassiniu di u prefettu Claude Erignac. Cunsiderava chì u prucessu in appellu ùn hà micca rispettatu u dirittu. L’avucati di Colonna anu da dumandà a liberazione di u so cliente [...]

Sta mane, dui omi sò stati chjappi è ritenuti da a pulizza pè l’inchiesta nant’à l’assassiniu d’Emmanuel Multedo, st’insignente tombu u ghjornu di a rientrata sculare in u 2008 in Bastia.

Sauveur Gandolfi-Scheit, u deputatu di Cismonte, hà sottumessu à l’Assemblea naziunale una pruposta di lege pè ubligà i ciclisti à purtà un elmu è un ghjileccu fiuriscente. Un testu signatu da altri deputati.

Paul Jo Caitucoli, u cunsiglieru generale di Pumonte, pensa chì u dipartimentu deve suspende a parte di l’aiutu à e cumune nant’à i documenti d’urbanismu sin’à l’« assise di u fundiaru è di l’alloghju » pruposte da l’Assemblea di Corsica. Sta situazione durerà sin’à e decisione chì seranu pigliate da st’assise è si face [...]

U giurnalistu Jean-Charles Chatard è u Duttore Denis Fauconnier, membri ch’avianu demissiunatu di a cumissione Tchernobyl di l’assemblea di Corsica anu dettu à Paulu Giacobbi chì u duttore Jacques Guillet ùn hè micca cumpetente, dunque preferiscenu una persona indipendente pè fà e statistiche.

Eri, à u centru di prumuzione suciale di Corti, i pruduttori è istituzione cuncernati da u cynips di u castagnu anu messu in piazza una cellula di lotta contr’à sta vespa chì rode l’arburu. Cuntinueranu à ricensà e zone cuntaminate è cercheranu u torymus, una mosca chì tomba l’ove di a vespa. Quessa tocca ancu [...]

Dumane, à l’università, ci serà una ghjurnata pè i dutturanti à l’anfiteatru Landry. Si presenterà tutti i so travagli. Pè e persone iscritte à a scola dutturale « ambiente è sucietà », ampareranu à cumunicà a so ricerca in un linguaghju semplice, à infurmà i membri di a cumunità scientifica, sviluppà cuntatti cù u mondu [...]

Pierre Ghionga, incaricatu di a lingua corsa à u cunsigliu esecutivu di a CTC, presenta un usu novu nant’à l’I Phone, pè amparà u corsu. Sò sequenze corte, « sott’à a forma di dialoghi interattivi, pè purtà u vucabulariu di basa. »

Dipoi un mese a cumpagnia CCM arregistreghja numerosi ritardi è annullazione di voli. A ragiò hè a zerga di i cuntrullori di a navigazione aerea d’Ecchisi. Dunque, a rinomina di a cumpagnia hè guastata.