Rivista di stampa di l’Adecec

Ci hè statu un terramotu in Italia, risentitu in l’Alpe Marittime, u Var è a Corsica, micca danni ma telefunate di persone à i suldati di u focu.

Un cumunicatu di a FFF è di a LFP hà annunziatu chì ùn ci serà micca scontri di ghjocu à pallò u 5 di maghju di u 2012, in memoria di e vittime di a catastrofa di Furiani.

Si compie oghje u prucessu di Marie Ange Luiggi, hè accusata d’avè tombu u cumpagnu di a so figliola in u 2009 in Lupinu, in Bastia.

A donna trova morta in Ville di Petrabugnu ùn serebbe micca stata tomba, sò i primi risultati di l’analisi.

Marti u 31 di ghjennaghju, ci seranu greve in l’Educazione Naziunale pè prutestà contr’à e suppressione di posti è dumandà ch’elli sianu cacciati unepochi di testi. Sò previste addunite in Aiacciu è Bastia.

Un cacciadore di 40 anni, Antoine Morere-Paoli, hè mortu eri in fine dopu meziornu in Tavera. L’omu hè statu scupertu da i so amichi cacciadori chì anu alertatu subitu i succorsi. A vittima hè stata assai ferita à u pettu è serebbe un accidente. Un’inchiesta hè stata aperta.

L’autossia d’Albert Pieri, tombu luni nant’à a strada di u Capicorsu, hè stata fatta eri à l’uspidale di Bastia è face sapè chì parechje palle sò state tirate. L’inchiesta cuntinueghja è esperti di u cuntinente seranu sopr’à locu per cuntinuà l’investigazione.

A cumunità d’aglumerazione di Bastia hè stata cundannata da u tribunale currezziunale à 100 000 euri d’amenda, è in sta somma avemu 70 000 euri attempati per via di a pulluzione di u vechju portu di Bastia, trà dicembre 2008 è aprile 2009. Solu a struttura intercumunale hè stata cundannata in stu cartulare.

A l’assemblea di Corsica, i raporti agriculi di Jean-Louis Luciani sò stati aduttati ma i naziunalisti si sò astenuti.

Dopu a greva di a settimana scorsa, i riprisentanti di a CGT à a SNCM è CMN anu piantatu torna di travaglià eri è sin’à sabbatu à mezanotte. I sindicalisti prutestanu contr’à l’apertura di una nova linea trà Tulò è a Corsica da a SNCM. Eppo, u Corse chì devia parte da Tulò sta sera per inaugurà a linea cù Bastia, hè bluccatu in Marseglia.